Enpresek IX. Enplegu Foroan izena emateko epea zabaldu du Deustuko Unibertsitateak
Martxoaren 20an eta 21ean izango da, Deustuko Unibertsitateko Bilboko campusean, ikasleen, enpresen eta unibertsitateko enplegua sustatzen duten erakundeen arteko urteroko topaketa hau, lana eta unibertsitatea hurbiltzeko. Ekitaldia Unibertsitateak berak antolatzen du, Eusko Jaurlaritzaren eta Bizkaiko Foru Aldundiaren laguntzarekin.
Urtero saiatzen gara formatua berritzen azaldu du Jesús Riaño zuzendariak-. Iaz profesionalekiko topaketak txertatu genituen, ikasleek bertatik bertara ezagutu zezaten laneratzeko prozesua. Aurten, berrikuntza mahai-inguru bat izango da. Bertara gonbidatuko ditugu adituak eta Foroan parte hartuko duten enpresak, unibertsitateko enpleguaren ikuspegia aztertzeko eta jarduera ildo posibleak zehazteko.
Gainera, izena ematen duten enpresek hainbat jardueratan parte hartu ahal izango dute, euren arteko networkinga eta Deustuko Unibertsitatearekikoa bultzatzeko; titulazioen eta unibertsitateko graduondokoen eskaintza zein den ezagutu ahal izango dute; eta, aurreko edizioetan bezala, enpresen aurkezpenak egingo dizkiete ikasleei eta hautaketa prozesuak hasi ahal izango dituzte bertan.
